Sirið Stenberg, landsstýriskvinna í almanna- og mentamálum, legði uppskotið um løgtingslóg um Brekumboð fyri Løgtingið fyri jól.
Við nýggju lógini fær landsstýriskvinnan heimild til at seta á stovn eitt Brekumboð, og eina nevnd, sum skal ráðgeva Brekumboðnum.
– At seta á stovn eitt Brekumboð er eitt nýbrot fyri føroyska samfelagið, og er endamálið at betra um rættindi og kor hjá fólki, ið bera brek. Tað hevur leingið verið tørvur á einum óheftum Brekumboðið í Føroyum, og tí fegnist eg um at lógin varð einmælt samtykt í Løgtinginum í dag, sigur Sirið Stenberg, landsstýriskvinna, við heimasíðuna hjá Almanna- og mentamálaráðnum.
Lógin ásetir millum annað, at Brekumboðið skal hava sum aðalmál at tryggja, at røddin hjá fólki, ið bera brek, gerst týðiligari í almenna rúminum.
Brekumboðið skal virka fyri, verja og hava eftirlit við, at innlendis lóggáva, tænastur og tilboð eru í samsvari við ST sáttmálan um rættindi hjá einstaklingum, ið bera brek.
Eisini skal Brekumboðið hava ein upplýsandi leiklut um rættindi hjá fólki, ið bera brek.
Sum ein liður í hesum arbeiði skal Brekumboðið millum annað veita ráð og vegleiðing, um rættindi, kæru- og klagumøguleikar, og gera frágreiðingar og kanningar um viðurskifti hjá fólki, ið bera brek.
Løgtingslógin um Brekumboð kemur í gildi 1. januar 2025, og Almanna- og mentamálaráðið fer nú undir fyrireikandi arbeiðið, skrivar heimasíðan.
