Altjóða oyggjaleikanevndin, International Island Games Association, kemur á vitjan í Føroyar.
Sum liður í, at Føroyar skulu gerast klárar til at hýsa Oyggjaleikunum 2027, so vitjar nevndin í Føroyum í nakrar dagar fyri at hyggja eftir umstøðunum í Føroyum.
ÍSF skrivar í tíðindaskrivi, at talan er um eina arbeiðsferð, har nevndin fer at vitja flestu ítróttahallir, vøllir og breytir, sum metast kunnu at verða tikin í nýtslu, meðan Oyggjaleikir eru í Føroyum, eins og tey eisini fara at heilsa upp á umboð fyri lands- og kommunalmyndugleikar, ítróttagreinar og ÍSF.
– Endamálið er at vísa nevndini ítróttaligu hentleikarnar – umframt at vísa á teir hentleikar, sum annaðhvørt skulu umvælast ella eru í gerð, skrivar ÍSF.
Nevndin fer eisini millum annað at heilsa upp á Føroya løgmann, Aksel V. Johannesen, sum eisini er verji fyri ítróttinum, Sirið Stenberg, landsstýriskvinnu í mentamálum, sum umsitur ítrótt, borgarstjórarnar í Havn, Runavík og Klaksvík og aðrar myndugleikar við.
Ítróttasamband Føroya er vertur hesar dagarnar, meðan IIGA er í Føroyum. Ferðalagið kemur til landið í morgin, 17. apríl, og ferðalagið fer av landinum aftur mánadagin 22. apríl.
Oyggjaleikirnir í Føroyum í 2027 verða í døgunum frá 3.-9. juli.
