Í dag er kunngjørt, hvør er tilnevndur til barna- og ungdómsvirðisløn Norðurlandaráðsins, og Bókadeild Føroya Lærarafelags fegnast um, at Rakel Helmsdal er millum tey tilnevndu við Toran gongur!
Tað skrivar Bókadeild Føroya Lærarafelags í tíðindaskrivi.
Í grundgevingini hjá Norðurlandaráðnum stendur millum annað at lesa:
“Við bókini Toran gongur setur Rakel Helmsdal orð og mynd á nakrar av stóru avbjóðingunum í dagsins samfelag og støðuni í heiminum júst nú. Søgan er bæði einføld og kompleks. Hon viðger álvarsom evni sum einsemi, sorg og deyða, kríggj og trauma, eins og hon eisini viðger øðrvísi familjusamansetingar, vinalag og týdningin av felagsskapi.
Bókin er myndprýdd við sterkum myndum, sum eru úrslitið av nærlagdum háttalagi, sum Rakel Helmsdal sjálvt hevur ment. Hon skapar figurar og seymar klæðir, byggir pallar, tekur myndir, ger grafisk prent, setir myndirnar saman og leggur lit á tær við akvarellum. Myndevnini styrkja hennara tekstheim og eru vorðin eitt eyðkenni í hennara ritverki.”
Bókadeild Føroya Lærarafelags skrivar, at Rakel Helmsdal (d. 1966) er viðurkendur føroyskur rithøvundur, sum hevur gjørt seg galdandi í norðurlondum. Hon gav sína fyrstu bók út í 1995, og hevur síðan útgivið eina rúgvu av bókum til bæði børn og vaksin.
Hetta er sættu ferð, at Rakel er tilnevnd til barna- og ungdómsbókmentavirðisløn Norðurlandaráðsins 2024.
Øll grundgevingin kann lesast á norden.org.
Les eisini:
