Eftir døgurða í gjár hendi eitt ferðsluóhapp á høvuðsvegnum omanfyri Hov.
Ein seyður leyp út á vegin júst tá ein maður kom koyrandi við síni motorsúkklu. Motorsúkklustjórin royndi at snara motorsúkkluni, so hon ikki rendi á seyðin. Hetta eydnaðist, men maðurin datt av motorsúkkluni.
Vaktleiðarin hjá Føroya Politi sigur, at maðurin ongan skaða fekk av óhappinum, tí hann hevði røttu útgerðina til at koyra motorsúkklu, men fór á sjúkrahúsið í Suðuroy til nærri kanningar.
Týsdagin hoyrdu vit, at Akstovan hevur latið løgreglustøðunum kring landið 684 mál um vegskattaeftirstøður.
Í nátt hevur løgreglan verið úti og tikið nummarplátur. 12 sett vórðu tikin í Havn, meðan 20 sett blivu tikin í Norðurøkinum, sum er Eysturoy og Klaksvík.
– Hetta kemur at halda fram komandi tíðina, men vit ringja fyrst at kunna um hetta, greiðir vaktleiðarin frá.