Eftir ein spennandi og hendingaríkan dag í Kolding er nú greitt, at Nexum hevur vunnið Next Level-kappingina, ið varð hildin í Koldingshus í Kolding í dag.
Tað skrivar Íverksetarahúsið.
Bólkurin hevur ment eitt hugskot til eina app, sum skal gera tað lættari fyri ung og arbeiðsgevarar at finna hvønn annan.
Í Nexum eru næmingar úr Runavíkar kommunuskúla og stovnararnir eru; Luna Klein Joensen, Petra Jonhardsdóttir Geyti, Miriam Bogadóttir Brekku og Leivur Lassen, og lærararnir hjá teimum eru Súsanna Jórunardóttir Brekku og Fróði Hansen.
Dómsnevndin legði millum annað dent á í grundgevingini, hví Nexum skuldi vinna, soleiðis:
“Nexum megnar við sínum hugskoti at hjálpa ungum at fóta sær á arbeiðsmarknaðinum, og harumframt at stuðla undir, at øll hava møguleika at vera við á jøvnum føti”.
Í alt 25 bólkar úr Danmark, Føroyum og Grønlandi luttóku.
– Vit ynskja NEXUM hjartaliga til lukku, og alt tað besta í víðarimenningini av teirra verkætlan, skrivar Íverksetarahúsið.
