Tá Málráðið varð skipað við lóg í 2012, varð ásett, at eftir trimum árum skuldi ein frágreiðing skrivast um, hvørt Málráðið virkar eftir ætlan, og um til ber at áseta reglur um Málráð, Staðarnavnanevnd og Navnanevnd í somu lóg.
Eitt tað fyrsta, sum landsstýriskvinnan setti í verk, var at fáa hesa frágreiðing til høldar, sum hon nú ætlar at leggja fram til orðaskifti í Løgtinginum seinni í ár.
Sirið Stenberg sigur við heimasíðuna hjá almanna- og mentamálaráðnum, at hon fegnast um, at politiska skipanin í næstum fær høvi at skifta orð um Málráðið, og hvussu tað virkar.
– Málráðið hevur ein týdningarmiklan leiklut í samfelagnum, tí tað skal røkja, menna og verja føroyska málið, eisini teknmálið. Tað skal harumframt vegleiða, ráðgeva og gera niðurstøður í málspurningum, sigur Sirið Stenberg.
Ein av uppgávunum hjá Málráðnum er eisini at áseta føroyska stavseting, og á móðurmálsdegnum 25. mars 2024 var fyrsta útgávan av løggildu Stavsetingarorðabókini løgd fram og kann nú nýtast á heimasíðuni hjá Málráðnum.
Í Málráðnum eru ellivu limir, og av hesum sita fimm í starvsnevndini.
Tey, sum hava skrivað frágreiðingina, eru Randi Kúrberg, forkvinna, Helena Kannuberg, varaforkvinna, og Heri J. Joensen, limur í Málráðnum.
Frágreiðingin kann lesast her: https://www.ammr.fo/…/tidindi/malradid-handad-fragreiding
Heimasíðan hjá Málráðnum sæst her: www.malrad.fo
Kelda: Almanna- og mentamálaráðið
