– Her undir oyggj, royðrarroyggj og lærlitt loðmýggj í lyngi…
Soleiðis ljóðar ein linja hjá einum av hittunum í fjør, tá bólkurin Bollarnir millum annað nevna lærlitt loðmýggj í sanginum “Kom við mær”, sum í ár passar væl til, hvussu støðan er í høvuðsstaðnum í løtuni, nú lærlittu loðmýggini aftur gera innrás.
Men higartil í ár hava vit enn ikki sæð eins nógv at sæð til hesi loðmýggini, eins og tað var í 2022, 2020 og serliga í 2018, tá Tórshavnar kommuna fekk fleiri fráboðanir frá fólki í Havn, sum vóru plágað av svørtu flugunum við reyðum beinum, sum kunnu tykjast heldur seinar, men fara upp at flagsa, tá sólin sær.
Lærlitt loðmýggj (latín: Bibio pomonae) eru umleið 10-13 millimetur til støddar.
Ikki nýggjur gestur
Ilt er at siga, nær loðmýggið er komið til Føroya, men tey hava verið vanlig í Suðuroynni í nøkur ár.
– Lærlitt loðmýggj hevur til dømis verið vanligt í haganum uttan fyri Sumba síðan miðskeiðis í 1980-unum, og onnur hava staðfest hetta skordýrið norðanfjørðs í umleið 1990, skrivar Jens-Kjeld Jensen á heimasíðu sínari, jenskjeld.info.
Fyri nøkrum árum síðani vóru so nógvar av hesum lærlittu loðmýggjunum á Tvøroyri, at tað var sum at síggja eitt svart surrandi larmandi skýggj hanga uppiyvir bønum, skrivar Jens Kjeld.
Lærlitt loðmýggj eru ikki vandamikil á nakran hátt, men verða fólk órógvað av hesum, so mælir Tórshavnar kommuna til at fólk seta seg í samband við skaðadjóratænastu. Kyktið kann verða rættiliga órógvandi, tá tað flagsar um høvdið á einum ella setur seg, tí at tað er so stórt.
Jens Kjeld skrivar, at grágæs halda lærlittu loðmýggini verða sera leskilig, og á Tvøroyri hava tey millum annað sæð, at grágæsnar hoppaðu upp í leysa luft fyri at fanga tey.
Ormveran livir av deyðum bløðum, rotnandi lívrunnum tilfari og grasrótum. Hildið verður, at gongdin frá ormveru til mýggj tekur trý ár, men her í Føroyum eru ábendingar um, at gongdin einans tekur tvey ár, tí lærlitt loðmýggj vóru í milliónatali í Havn í 2018, 2020 og aftur í 2022. Hetta kundi bent á, at tey finnast í stórum tali makað ár, skrivar Jens-Kjeld Jensen millum annað í Frøði.
