Tað man elva til stórt høvuðbryggj hjá fyrireikarunum handan Wimbledon og kappingarstjóranum, Jamie Baker, nú veðrið áhaldandi setur steðgir í spælið, og leggur størri trýst á at fáa kappingarskipanina at ganga upp.
Men fyri at gera ilt verri, hava umhvørvismótmælisfólk nú eisini fingið steðgað einum dysti.
Tað stuttu løtuna, spælt hevur verið í dag, megnaðu mótmælisfólk, sum eftir øllum at døma eru frá felagsskapinum Just Stop Oil, at taka seg inn á Court 18, har Grigor Dimitrov og Sho Shimabukuro spældu.
Mótmælisfólkini bæði kastaðu konfetti og tað, sum sær út til at vera eit putlispæl, á vøllin, áðrenn annar teirra setti seg á vøllin.
Protestors jump onto court 18 at #WIMBLEDON half way through Dimitrov & Shimabukuro.
— Molly Clayton (@mollclayton) July 5, 2023
Crowds cheering as they’re both removed. pic.twitter.com/GNWroRO1SY
Trygdarfólk hjá Wimbledon vóru skjót á vøllin at taka tey burtur, og síðani varð vøllurin ruddaður.
Wimbledon hevur annars hert eftirlitið við gestunum í ár, tí at ótti hevur verið fyri, at Just Stop Oil fór at gera seg inn á spælið.
Allir gestir verða gjølla kannaðir, áðrenn teir sleppa inn á Wimbledon økið, og eingin sleppur at hava pulvur við av nøkrum slagi, tí vanliga nýta Just Stop Oil appelsingult pulvur at kasta við.
Hesaferð høvdu tey so latið pulvurið verið eftir heima, men ístaðin fingu tey appelsingult konfetti inn við.
