Í gjár boðaði Sp/f Brúsá frá, at frá 1. september verður Robert Sivertsen nýggjur stjóri í Brúsá, meðan verandi stjóri Jákup Brúsá framyvir verður nevndarformaður í felagnum, og tað er ikki uttan orsøk, at hetta stjóraskiftið er framt. Tí í dag kunnger Kirkjuliga Heimamissiónin, at Jákup Brúsá er nýggjur aðalskrivari í Kirkjuligu Heimamissiónini – frá 1. september at rokna.
Tað skrivar Trúboðin á heimasíðu sínari.
– Eg eri ógvuliga spentur uppá nýggja starvið og síggi stóran týdning í arbeiðinum hjá Heimamissiónini, sigur Jákup. Kristiliga arbeiðið hevur altíð verið eitt hjartamál hjá mær, tí boðskapurin um Jesus Kristus bjóðar menniskjum fyrigeving, frælsi og sálarfrið – og tað hava vit øll brúk fyri, sigur nýggi aðalskrivarin við heimasíðuna.
Sjálvbodna arbeiðið hevur fylt nógv í Jákupsa lívi. Hann hevur saman við konu síni verið virkin í nógv ár í ungdómsarbeiði, bæði í Leirvík og nú í Tórshavn. Eisini hevur hann skipað fyri nógvum legum í Nesvík, sjósett og verið ritstjóri fyri ungdómsbíbliulesiætlanini KUMPAS í fleiri ár, verið virkin í KFS-arbeiðinum í sínum studentaárum og í øðrum felagsskapum ígjøgnum árini. Harafturat hevur tónleikur fylt nógv í hansara tænastu, bæði innan Heimamissiónina umframt at hann í fleiri ár var urguleikari í Leirvíkar kirkju.
Seinastu nógvu árini hevur Jákup rikið sína egnu fyritøku og starvast sum ráðgevi innan talgilda marknaðarførslu og samskifti. Harafturat hevur hann verið undirvísari á Fróðskaparsetrinum og á hægri nám á Glasi umframt at verið nógv umbiðin sum skeiðs- og fyrilestrahaldari. Hann hevur BA útbúgving innan Samskifti og Miðlar og eina MSc. innan Talgilda Marknaðarførslu.
Jákup, ið er 36 ára gamal, búsitandi á Argjum saman við konu síni Lív og dóttrini Vón, er ikki ókendur innan kristiliga arbeiði. Hann starvaðist sum ungdómsráðgevi í Heimamissiónini frá 2008-2010. Síðan hevur hann verið parttíðarsett samskiftisfólk í felagsskapinum seinastu átta árini. Hann er eisini næstformaður í stýrinum og formaður í ungdómsarbeiðinum í Meinigheitshúsinum í Havn.
