Tann 29. november 1978 vann Ongland 1-0 á Tjekkoslovakia í einum venjingardysti á Wembley. Høgri bakkurin hjá Onglandi handa dagin var Viv Anderson frá Nottingham Forest og hann gjørdist sostatt fyrsti litti leikarin, sum umboðaði Ongland í einum A-landsdysti.
Viv Anderson var føddur í Nottingham í 1956 og byrjaði yrkisleiðina við Forest í 1974, har hann vann sær fast pláss árið eftir. Sum vongbakkur spældi hann ein týðandi leiklut á liðnum, sum vann meistaraheitið í 1978 og Europa Cup fyri meistaralið í 1979 og 1980. Hann var eisini við til at vinna League Cuppina tvær ferðir (1978 og 1979) og UEFA Super Cuppina í 1980.
Tað var hansara frálíka fótbóltsspæl undir góðu gongdini, sum førdi til, at enski landsliðstjórin, Ron Greenwood, tók hann út til venjingardystin ímóti kekkunum. Støðan var framvegis málleysur javnleikur, tá Anderson streyk frameftir fyri at skapa pláss til Tony Currie, sum legði bóltin inn í brotsteigin, har Steve Coppell sendi bóltin í málið.
Hóast áhaldandi góð avrik, noyddist Anderson at bíða til juni 1979, áðrenn hann aftur spældi fyri Ongland og hann spældi ongan kappingarføran dyst fyrr enn í november 1979. Samanlagt spældi hann 30 landsdystir, har hann fekk tann seinasta í 1988. Hann gavst umsíðir í 1995 og varð valdur til enska Heiðursskálan (Hall of Fame) fyri fótbólt í 2004.
