– Persónliga havi eg havt eitt gott kappingarár. Eg havi verið heppin, at eg ikki havi havt nakrar stórvegis skaðar í ár.
Tað sigur ársins verjuspælari 2023 hjá monnum, Odmar Færø, sum umframt at gerast ársins verjuspælari eisini gjørdist ársins landsliðsspælari.
Onkur skemtaði við, at Odmar gjørdist toppskjútti á landsliðnum í ár við einum máli, sum hann fekk móti Albania á Tórsvølli í summar.
– Ja, onkur hevur prikað eitt sindur við tí, men so eru tað eisini summi, ið hava prikað meg við, at eg skal sleppa mær av við armarnar, sigur Odmar.
Í ár eru tvey brotsspørk dømd ímóti Føroyum, har bólturin er komin á armin á Odmari. Hetta hendi í landsdystinum úti móti Póllandi, umframt í útidystinum móti Kekkia.
Ársins verjuspælari 2023 hjá kvinnum er Birita Ryan úr KÍ.
– Vit fara eftir greipuni komandi kappingarár, tí tað kiksaði í ár móti NSÍ í steypafinaluni, sigur hon.
Hon vísur á, at hóast KÍ-liðið bert hevur latið fýra mál inn í landskappingini í ár – harav tað eina var eitt sjálvmál, so hevur liðið fingið mótstøðu.
– Men eg haldi, at vit hava verið sera stinnar í verjupartinum í ár, sigur Birita Ryan.
Ársins landsliðsspælari hjá kvinnum gjørdist KÍ-málverjin, Óluva A. Joensen.
