Í nátt varð boðað frá eldi í City Church í miðbýnum í Havn.
Fráboðanin kom inn klokkan 00:18, og ein minutt seinni var ein løgreglupatrulja á staðnum, har staðfestast kundi, at talan var um rættiliga stóran eld. Løtu seinni komu nakrir sløkkiliðsbilar á staðið og byrjaðu at sløkkja eldin.
Eldurin bleiv sløktur um hálvgum tvey tíðina í nátt, men løgreglan hevur staðið vakt á staðnum í alla nátt.
Vaktleiðarin hjá Føroya Politi sigur í morgun, at City Church hevur fingið rættiliga stóran skaða av eldinum, og nú skal kannast, hví eldur kom í, men tá løgreglan kom á staðið í nátt beint eftir midnátt, so kundu teir síggja, at eldurin, at síggja til, er byrjaður har oljufýringin stendur.
Óviðkomandi gestur á gistingarhúsi
Í gjár fekk løgreglan eisini eina fráboðan um, at illgruni var um, at onkur óviðkomandi fólk hevði verið inni í einum gistingarhúsi í Havn, men uttan at hava bílagt ella goldið fyri sítt uppihald har.
Vaktleiðarin sigur, at upptøkur frá vakmyndatólum vórðu hugd ígjøgnum, har staðfestast kundi, at eitt fólk hevði verið á gistingarhúsinum, ið ikki var skrásettur sum liggjandi gestur.
Løgreglan fann fram til viðkomandi, og nú er illgruni um, at viðkomandi eisini hevur verið á øðrum gistingarhúsi, so nú arbeiðir politiið við tveimum sakum, har viðkomandi fólk hevur verið og gist á tveimum gistingarhúsum, men uttan at hava bílagt pláss ella goldið fyri sítt uppihald.
Í nátt hoyrdist eisini alarmur um alla vágna í Klaksvík. Alarmurin kom úr seglbátinum Draganum, men til alla lukku, var talan bert um tekniskan feil.
Eisini bleiv ein stormskaði fráboðaður í gjár, tá ein bilur varð raktur av einari takplátu. Hetta hendi fyrradagin, men bleiv ikki fráboðað fyrr enn í gjár.
