Í døgunum 17. til 23. mars verður Fótbóltssamband Føroya vertur fyri bólki B3 í EM-undankappingini fyri U17 gentur. Umframt Føroyar sum vertsland, vera Lettland, Georgia og Rumenia eisini við í kappingini.
Leikdagarnir eru sunnudagin 17. mars, mikudagin 20. mars og leygardagin 23. mars.
Eyðvør Jakobsen er venjari hjá U17 gentunum, og hon er sum heild bjartskygd til komandi uppgávu, men væntar samstundis ymiska mótstøðu frá teimum trimum londunum, ið koma hendan vegin.
– Eg kenni ikki so nógv til hini londini annað enn at Rumenia flutti niður úr deild A seinast, har tær møttu Eysturríki, Týsklandi og Ukraina. So vit kunnu rokna við at tær eru sterkasta landið í bólkinum.
– Fyri einum ári síðani taptu vit 1-0 fyri Lettlandi, meðan Georgia endaði aftast í sínum bólki til seinastu EM-undankapping. Tí er eitt sindur ilt at meta um dystirnar frammanundan, men vit ætla okkum sjálvandi so góð úrslit sum tilber, sigur Eyðvør Jakobsen við heimasíðuna hjá FSF.
Samrøða við landsliðsvenjaran á FM1
FM1 fer at siga frá dystinum millum Víking og HB í Sarpugerði í Norðragøtu, sum byrjar klokkan 18.
Sendingin byrjar klokkan 17.30, og fyrsta stóra korterið fara vit at umrøða EM-undankappingina hjá føroyska U17-kvinnulandsliðnum á heimavølli, har vit fara at hoyra samrøðu við U17-landsliðsvenjaran, Eyðvør Jakobsen. Frá klokkan 17.50 verður sent beinleiðis úr Norðragøtu.
Skráin fyri EM-undankappingina sær soleiðis út:
Sunnudagin 17. mars
Kl. 13:00 Lettland – Føroyar
Kl. 17:00 Rumenia – Georgia
Mikudagin 20. mars
Kl. 13:00 Føroyar – Georgia
Kl. 17:00 Rumenia – Lettland
Leygardagin 23. mars
Kl. 17:00 Føroyar – Rumenia
Kl. 17:00 Georgia – Lettland (á Ovara vølli í Gundadali)
Allir dystirnir verða vístir í Televarpinum, og á Youtube rásini hjá FSF.
