Beint eftir klokkan hálvgum tólv í dag rendi ein bilur beint inn í rundkoyringina í Eysturoyartunlinum, har listarverkið hjá Tróndi Patursson stendur.
– Bilførarin varð fluttur á Landssjúkrahúsið til nærri kanningar, men var við vit, sigur vaktleiðarin hjá Føroya Politi.
Ikki er greitt, hví bilurin rendi frontalt á rundkoyringina í Eysturoyartunlinum, men bilurin, umframt listarverkið, hevur fingið nakað av skaða, men hvussu stóran skaða veit løgreglan ikki.
Í samband við bilóhappið, so var tunnilin stongdur eina lítla løtu.
Tróndur Patursson hevur skorið umleið 80 metrar av stáli til listarverkið, sum prýðir rundkoyringina í Eysturoyartunlinum. Listarverkið myndar fólk, ið dansa føroyskan dans, og er vorðið eitt monument, sum eisini hevur vakt stóran ans uttanlands.
