Triðja dagin á rað taptu okkara menn 2½-1½. Hesaferð møttu vit eykamonnunum hjá vertstjóðini. Tað endaði aftur javnt á trimum av fýra borðum. Men so tapa vit fjórða talvið og harvið dystin.
Í gjár var tað Rógvi Egilstoft, sum lá eftirá. Rógvi hevur annars verið ósigraður í kappingini higartil. Mótstøðumenninir høvdu hægri styrkitøl á fremstu trimum borðunum, men mótstøðuliðið er bara eitt pláss ovari enn vit í styrkismetingini.
Martin Poulsen fekk eitt kærkomið remis í gjár. Hann hevði svarta fólkið móti altjóða meistara við væl hægri styrkitali, men í gjár hepnaðist tað, sum mishepnaðist í fyrradagin.
Høgni og John halda fast um góðu gongdina, og fingu báðir remis.
Føroyska liðið hevur ongan tiltaksmann í Montenegro. Hesir fýra mugu tí telva allar níggju dystirnar fyri Føroyar. F. v.: Høgni Egilstoft Nielsen, Martin Poulsen, Rógvi Egilstoft og John Rødgaard.
4. umfar – 14. november (EM Montenegro)
| Bo. | 36 | Faroe Islands | Rtg | – | 35 | Montenegro C | Rtg | 1½:2½ |
|---|---|---|---|---|---|---|---|---|
| 18.1 | FM | Nielsen, Hogni Egilstoft | 2387 | – | IM | Kalezic, Blazo | 2401 | ½ – ½ |
| 18.2 | FM | Poulsen, Martin | 2291 | – | IM | Krivokapic, Marko | 2386 | ½ – ½ |
| 18.3 | FM | Egilstoft, Rogvi | 2254 | – | Draganic, Veljko | 2294 | 0 – 1 | |
| 18.4 | IM | Rodgaard, John | 2281 | – | Miletic, Vuk | 2190 | ½ – ½ |
Skotland í morgin
Í fimta umfari í dag fær føroyska liðið ein týðandi lykladyst. Vit møta Skotlandi, sum er annað av liðunum í kappingini, ið er styrkismett aftari enn vit. Skotar hava ikki allar sínar fremstu telvarar við í Montenegro.
Altjóða meistarin Andrew Muir, sum er á 1. borði, er í løtuni nummar sekstan á skotska styrkilistanum. Sterkasti telvari í Skotlandi er stórmeistarin Jonathan Rowson. Hansara styrkital er 2538. Okkara stórmeistari, Helgi Dam Ziska, hevur styrkitalið 2548.
Spenningur
Tað gongur annars javnt á í oddastríðnum. Týskland, Armenia og Pólland eru fremst, men fleiri lond anda í nakkan á teimum.
Úrslit í gjár:
Týskland-Pólland 2-2
Holland-Rumenia 2-2
Armenia-Ísrael 3-1
Kroatia-Aserbadsjan 2½-1½
Turkaland-Ongland 1½-2½
Grikkaland-Spania 2½-1½
Frakland-Italia 1½-2½
Finnland-Norra ½-3½
Ísland-Ungarn 1½-2½
Danmark-Belgia 3-1
Svøríki-Albania 3-1
Kosovo-Skotland 3½-½
Kelda: Talvsamband Føroya
