Heimasíðan hjá Hondbóltssambandinum skrivar, at atgongumerkjasølan gongur væl, nú Føroyar fara at spæla tveir venjingardystir móti Belgia fríggjadagin 5. og leygardagin 6. januar, áðrenn føroysku hondbóltsmenninir leggja leiðina til Berlin í Týsklandi.
– Vilja tit síggja Føroyar á heimavølli undan EM, er at skunda sær at keypa á atgongumerki.fo. Dystarbyrjan er báðar dagarnar klokkan 19.30, skrivar heimasíðan hjá Hondbóltssambandinum.
Belgia vann seg ikki í EM-endaspælið, men tapti sínar dystir sera tepurt fyri Kroatia, Hollandi og Grikkalandi. Belgia vann seg til seinasta HM-endaspæl, og gjørdist liðið tá nummar 21 av 32 londum.
Føroyar hava møtt Belgia sjey ferðir áður, men Føroyar hava ongantíð vunnið móti Belgia.
Úrslitini hava verið hesi:
27.10.12 Belgia – Føroyar 36-22
18.01.03 Belgia – Føroyar 24-17
15.01.03 Føroyar – Belgia 22-22
13.10.87 Belgia – Føroyar 28-14
12.10.87 Belgia – Føroyar 32-13
09.02.86 Belgia – Føroyar 17-11
01.12.76 Belgia – Føroyar 25-24
Kelda: hsf.fo