Eftir at Dagur og Vika í innslagi í gjár greiddi frá, at eitt danskt felag, Saga, hevur fingið kvotu til vinnuligar fiskiroyndir eftir svartkjafti undir Føroyum, har útlendingar eiga 70 prosent í felagnum, so hevur Fiskivinnumálaráðið hesa viðmerking til innslagið:
“Í Degi og Viku mánakvøldið 26. februar 2024 varð greitt frá einari av umsóknunum / verkætlanunum, sum í ár hava fingið tillutað svartkjaft til vinnuligar fiskiroyndir. Spurnartekn varð sett við, hvørt tillutanin er í samsvari við ásetingarnar um ognarviðurskifti í sjófeingislógini (§ 11).
Í kunngerðini um fiskiskap eftir svartkjafti í 2024 eru 7.000 tons sett av til vinnuligar fiskiroyndir. Eftir innanhýsis viðgerð og í samráð við Havstovuna eru fimm av teimum 14 umsóknunum játtaðar, og hava hesar fingið tillutað tey 7.000 tonsini, sum vóru tøk.
Í viðgerðini og raðfestingini av umsóknunum er serligur dentur lagdur á menningar- og nýskapanarvirðið í royndunum. Millum játtaðu umsóknirnar eru eins og undanfarin ár talan um bæði skip og virkir á landi. Í ár er talan um tvey skip, sum skulu gera royndir við trolútgerð, og trý virkir á landi, sum á ymiskan hátt virka svartkjaftin, so virðisøkingin verður størri enn við vanligari framleiðslu.
Ásetingarnar í lógini um sjófeingi um ognarviðurskifti fevna um vinnuligan fiskiskap og ikki um framleiðslu á landi. Í svarinum til umsóknirnar, sum hava fingið tillutað kvotu, er við tilvísing til § 50, stk. 4 í sjófeingislógini tilskilað, at fiskiskapurin kann bert fara fram við fiskifari undir føroyskum flaggi við veiðiloyvi, og kvoturnar kunnu bert nýtast av teimum skipum/bátum, sum eru nevnd í umsóknini og sum lúka ásetingarnar í sjófeingislógini fyri at fáa fiskiloyvi”.
Tað er smápartafelagið Saga, sum hevur fingið 1.200 tons av svartkjafti til vinnuligar fiskiroyndir.
Kringvarpið skrivar, at hetta felagið er 70 prosent danskt.
Kringvarpið skrivar, at Føroyingurin Lars Larsen, sum býr í Juelsminde, eigur 35 prosent og tað sama ger Yuying Huang, sum eisini eigur 35 prosent, ella 70 prosent samanlagt. Yuying Huang býr eisini í Juelsminde.
Gestur Hovgaard, sum arbeiðir við lærda háskúlan í Nuuk í Grønlandi og hevur adressu á Kirkju, eigur saman við konuni, Anna Katrin Matras, við adressu í Havn, 25 prosent, meðan Eyðstein Eyðunsson Elttør, sum býr í Klaksvík, eigur fimm prosent.